Sòm 5  

1 Pou chèf sanba yo. Se sou enstriman yo rele fif pou yo jwe mizik la. Se yon sòm David. (5:2) Koute sa m’ap di ou, Seyè! Tande jan m’ap plenn!

²  Se ou ki wa mwen, se ou ki Bondye mwen. Pran ka m’, Seyè, lè m’ap rele ou! Se ou menm m’ap lapriyè, Seyè.

³  Chak maten ou tande vwa m’. Kou solèy leve, mwen mete lapriyè m’ devan ou. M’ap tann ou reponn mwen.

⁴  Ou se yon Bondye ki pa pran plezi nan bagay ki mal. Ou pa tolere mechan yo bò kote ou.

⁵  Moun k’ap vante tèt yo pa ka kanpe devan ou. Ou pa vle wè moun k’ap fè mechanste.

⁶  Ou detwi tout moun k’ap bay manti. Ou pa ka sipòte moun k’ap touye moun, ni moun k’ap twonpe moun.

⁷  Men mwen menm, m’a antre lakay ou, paske ou renmen m’ anpil. M’ap lage kò m’ nan pye ou, nan kay ki apa pou ou a. M’ap adore ou.

⁸  Seyè, mwen gen anpil lènmi k’ap veye m’. Pran men m’ pou m’ ka fè sa ki dwat devan ou. Fè m’ wè chemen ou mete devan m’ lan, fè m’ wè l’ aklè.

⁹  Ou pa janm ka kwè moun sa yo. Se dèyè yon sèl bagay yo ye: yo vle fini ak tout moun. Anndan bouch yo, ou ta di yon kavo ki louvri, lang yo menm dous konsa pou flate moun.

¹⁰  Se mechan yo ye. Kondannen yo, Bondye. Gate tout plan yo te fè. Pou valè peche yo fè, wete yo devan jè ou. paske se kenbe y’ap kenbe tèt ak ou.

¹¹  Men, tout moun ki mete konfyans yo nan ou, fè kè yo kontan. Se pou yo chante san rete tèlman yo kontan. W’ap pwoteje moun ki renmen ou. Ou fè yo chante pou ou tèlman yo kontan.

¹²  Paske ou menm Seyè, ou beni moun ki obeyi ou. Ou kouvri yo avèk favè ou, w’ap kanpe bò kote yo pou pran defans yo.

Vèsyon Orijinal Kreyol Ayisyen {VOKA}