Pou chèf sanba yo. Se yon sòm David.  

¹  Wa a kontan, Seyè, dèske ou te ba li fòs kouraj. Wa a kontan nèt dèske ou fè l’ genyen batay la.

²  Ou ba li tou sa l’ te renmen. Ou pa t’ refize l’ sa l’ te mande ou.

³  Ou vin bò kote l’ avèk anpil benediksyon, ou mete yon kouwòn fèt ak bon lò sou tèt li.

⁴  Li mande ou lavi, ou ba li l’. Ou ba l’ yon lavi ki long, yon lavi ki p’ap janm fini.

⁵  Y’ap fè gwo lwanj pou li, paske ou ede l’, ou fè yo respekte l’, ou ba li bèl pozisyon,

⁶  Ou mete benediksyon ou sou li pou tout tan. Ou fè kè l’ kontan paske ou la avè l’.

⁷  Wa a mete konfyans li nan Seyè a. Gremesi Bondye ki anwo nan syèl la, wa a la pou tout tan.

⁸  Wa a ap mete men l’ sou tout lènmi l’ yo, l’ap mache pran tout moun ki pa vle wè l’ yo.

⁹  Lè w’a parèt, w’ap detwi yo tankou yon gwo boukan dife. Lè Seyè a ankòlè, se fini l’ap fini ak yo, dife ap boule yo nèt.

¹⁰  W’ap disparèt tout pitit yo sou latè, w’ap disparèt tout ras yo pami lèzòm.

¹¹  Y’ap fè move plan, y’ap fè konplo sou wa a, men sa p’ap mache pou yo.

¹²  L’ap tire flèch li sou yo, l’ap fè yo kouri ale.

¹³  Seyè, leve non. Fè yo wè fòs ou! N’a chante, n’a fè lwanj pou jan ou gen pouvwa!